Թևավոր խոսքեր

Առյուծի բաժին Նշանակում է ամենամեծ և ամենաընտիր բաժինը, որ իրեն է վերցնում ուժեղը: Արտահայտությունը գալիս է Եզոպոսի "Առյուծը, աղվեսը և էշը" առակից: Արջի ծառայություն Առաջացել է Ա. Ի. Կռիլովի "Ճգնավորն ու արջը" առակից (1808): Նշանակում է` ծառայություն, որ օգուտի փոխարեն վնաս է պատճառում: Բարդուղիմեոսյան գիշեր 1572 թ. օգոստոսի 24-ի գիշերը, կաթոլիկ եկեղեցու հրամանով սուրբ Բարդուղիմեոսի տոնակատարության օրը Փարիզում կաթոլիկները կոտորեցին հուգենոտներին (բողոքականներին): Փոխաբերական իմաստով նշանակում է մասսայական ոչնչացում, արյունոտ ջարդ. սպանդ, կոտորած: Գեղեցիկ աչքերի համար Մոլիերի արտահայտությունն է "Սեթևեթուհին" (1660) կատակերգությունից: Օգտագործվում է, երբ մեկի նկատմամբ ցուցաբերվում է ուշադրություն ոչ թե ըստ նրա արժանիքների, այլ նրա հետ ունեցած մտերմական կապերի համար: